'Mɛi ke dɛjrɛ' 'ɛ mu
49
Kore 'a "nynuu 'a 'dʋ ‑ɛ ‑nɩa 'a 'e bleʋn klaa" 'a 'dʋ sbɛ 'di ɛ.
2 'Oo ao po doun" i ao 'blʋɩ ‑wee'‑,
ao nyiɔ ‑nɩa 'e 'blʋɩ "kpei ɛ ao 'dba douin" 'a 'kpɩ.
3 Mɩɩ" o, klae" o, nɩa" jeʋn o, "wliiɛ jeʋn o,
4 dɩ 'dɔe 'a 'sʋ ‑a ‑wlʋ 'ʋn wɔn 'di,
dɩ 'dɔe 'a 'sʋ 'ma pɛe a naa tɔ' "kpei.
5 'Srɩn 'dɔe mɩ 'ma po doun" o,
‑bo 'ma sea 'ma ‑si' ‑plʋ bla a, 'ma ‑sɩ wɔ.
6 Dɛɛ‑ faʋn 'je 'ʋn nʋ ‑ɛ, ‑bo 'ɩn 'kpa 'e 'kle 'di,
‑bo dɩsaɩn mɩ ‑pin' 'ʋn mɔ 'de ɛ,
7 ʋʋ ‑teɛ' ʋʋa' "wliiɛ‑ ‑kwlɩ"
‑wɛe ‑ʋʋa ‑bɛɛa' ʋʋa' ‑cɛi" 'de ʋʋa' dɛ 'ble ‑tɩ 'ʋn.
8 'De ‑mɛ nyɔ 'oo nyɔ mɔɔ' ‑cɛ" seɛ 'bɛɛ‑ ɔ 'jeɔ "dɛi 'a 'kmʋ ‑tɩn',
‑wɛe ɔ 'je ɔɔ' ‑cɛ" 'ɛ 'kmʋ 'a sɔɔn' ja 'de Kea 'kwa.
9 Dɛ ‑nʋɛ 'kmʋ ‑seie 'a sɔɔn' ‑tiɛi",
nyʋ 'je ɛɛ' tɛ tu "jru 'di ‑sa 'de 'wɩ '‑oo 'wɩ ‑wee'‑ "klein 'di.
10 Ʋʋa naa tɔ' i ʋʋ 'je 'kmʋ nɩ
'de nɔ" 'oo nɔ" ‑wee'‑ "klein 'di, ‑wɛe ʋʋ 'je 'mɛbie "i ‑gbla"?
11 Nyɔ ɔ jeɛ tɔ' 'di nɩ i ɔɔ jea 'mɛ, ‑wɛe sɩɩanʋɩ o,
nyɔ ‑sea' tɔ' 'di nɩ o, ʋʋa jea 'mɛ ‑ke
ʋʋa jea ʋʋa' "wlii nyʋ jrʋ' o sie.
12 Ʋʋa naa tɔ' i ʋʋ 'na ʋʋa' ‑gbi" se 'wla i
mamaʋ 'sʋ ʋʋa ‑te ‑na a muɛ ‑kwlea' 'de
"nɔ 'oo nɔ" ‑wee'‑ "klein 'di.
‑Wɛe ʋʋa' 'nynɩ se 'mɛ i 'de 'blʋa 'di.
13 'De ‑mɛ 'nynɩ 'wlʋ i 'a ‑kwle 'kmʋ'.
Ka nmi nɩa, ɔɔ muɛ mɛɛa'.
14 'Kamɔ nyʋ ‑ʋʋ ‑tea' ʋʋpʋ‑ ‑kwlɩ" ke,
nyʋ ‑ʋʋa poa ʋʋa' 'tmʋʋ ‑tɩ ‑tɩ' o 'a 'kmʋ nɩ‑. ‑Te' ‑kwlʋ.
15 Nyʋ a "tun ʋʋpʋ‑ 'mɛ 'de 'mɛbie "wɛin ka nyɔ ɔ "tuan
'blae 'a ‑gbʋn ɛ, kɩɩn 'mɛa' mɛ ‑ɛɛ po ʋʋpʋ‑ ‑je o,
‑bo ‑sɔn' ‑sɩn' "isrɛʋn a muɛ ʋʋpʋ‑ "kpei naa'.
Ʋʋa' "jrii nmɔa' ‑kwɛ wɔn 'de ‑gbaɩn' 'di,
ʋʋ tɛɛn ʋʋa' ‑tena kɩɩn.
16 'Kaa Kea a muɛ 'ma 'kmʋ ‑seia' 'de 'mɛʋ "klu,
dɛ ‑nʋɛ ɛ muɛ 'ʋn "dua'. ‑Te' ‑kwlʋ.
17 Ɛmɛ ‑tɩ ‑bo ‑ɩn ‑je nyɔ ɔɔ jea "wliiɛ 'ble ɛ,
ɛ 'bo ‑ʋn ‑kwlʋ kpʋn ɛ,
‑bo ‑ɩn‑ ‑je dɩ 'dɔe ɩ ‑tee' "kpei
'de ɔ o ‑gbu" 'di mɔ 'de ɛ,
ɛ 'bo ‑ʋn dɛ jrɛ' "i 'daa‑.
18 Dɛ ‑nʋɛ ‑sɔn ‑tɩ ɔɔ mua 'mɛɛa' a
dɩ ɔ 'blea ɔ sɩ kpa i, ɔɔ' "wliiɛ se ɔ kɩɩn mu i.
19 ‑Ta ɔ nɩa 'kmʋ ɔ 'na ɔ nɩɛ 'e 'mʋa‑ 'ʋn,
ʋʋ 'bɛɛ' ʋʋ 'jeɔ 'nynɩ ‑sa 'de ɔɔ' dɛ 'ble ‑tɩ 'ʋn.
20 Ɔɔ muɛ ɔ "bo ‑wi" ‑kwlɩ" mua,
‑ʋʋ sea Kea 'a ‑nɩ ‑sɔn 'jei 'bode ‑bode 'bode ɛ.
21 Nyɔ nyʋ a ‑sa 'nynɩ,
‑bo ɔ se tɔ' 'di nɩ ɔɔ muɛ 'mɛa' ka nmi a 'mɛa.